好白相 | 儕蠻好
作者:由 為知數 發表于 曲藝時間:2022-02-03
《 儕蠻好》
吃飽夜飯看電視,
瓜子剝剝茶泡泡;
女人吵咯男人作,
芝麻胡同儕蠻好。
《都挺好》是一隻電視劇,最近一腔老紅。講蘇家一家門的家長裡短,生活背景應該是勒蘇州。
理由一,鏡頭裡常常有蘇州評彈串戲,只不過,勒了蘇大強的眼神裡,隨便哪能尋勿著對迭種吳儂軟語的痴迷;理由二,取景點勒蘇州。喏,蘇家老宅,迭個蘇大強死吵活吵要賣脫的老房子,就勒蘇州武昌路420弄5-37號的同德裡。搿名字聽上去阿有點似曾相識?對了,搿地方好像跟上海也有點牽絲攀藤的關係。據說老底子辰光杜月笙勒此地造過房子,出租。撥現在講起來,叫做勒此地投資過房地產。
喏,還有“食葷者”迭只小飯店就勒平江路哴向搭個景,開飯店的,就是撥阿拉同學元講起來“不說話、偶爾笑、眼裡有戲、一寸相思一寸灰”的石天冬,只不過,伊一開口也穿繃,一口臺灣腔糯也是糯的,只不過,是臺灣滷肉飯的糯,勿是蘇州黃天源糕團的糯。
捺麼,結論是啥呢?電視劇儕蠻好,就是看到蘇大強就勿好了。
理由一是因為伊作,像煞也嘸啥道理,就是一隻作精轉世,作天作地,發老嗲、耍無賴無所勿能及……看到伊出來,就想尋只借口上個廁所吃口茶,轉一圈再回來;理由二是因為伊隨便哪能作儕勿像個蘇州人。
當然,一脈相承的蘇家其他人也勿見得有多少蘇州人味道。儂再去看看同時播出的《芝麻胡同》,就光聽聽一串串溜光的滑的老北京閒話,就曉得搿眼人是吃啥水長大的。
滬語解釋
隨便哪能:無論如何
尋勿著:找不著
“點選
閱讀原文
就能購買老師的畫作喲”